1Th 1 | BEF | STEP | Lenali Tesalonika metoga bona'ise. Lenali afotifu Hu'ma to Sipi Boti Yesu Kilisitohi bona'ise. Nani Poluita to Silasiugo, Timotiugo lali nohuto lenali ya'ma fayapo koyo nolepune. Hu'mamofihi lenehe'mose'na'a to fuluna'a lenalitoga minomo tito mineno.

1 Thessalonians 1

1 Lenali Tesalonika metoga bona'ise. Lenali afotifu Hu'ma to Sipi Boti Yesu Kilisitohi bona'ise. Nani Poluita to Silasiugo, Timotiugo lali nohuto lenali ya'ma fayapo koyo nolepune. Hu'mamofihi lenehe'mose'na'a to fuluna'a lenalitoga minomo tito mineno.

Tesalonika bona'magi kohe tete yata'a keheli'ahana amuya melete mono kapogu bi'ahana.

2 Lali asaga yupahi lenali kumu yabe luto Hu'mamofitoga lofokehi hoto nunumu huba huba huto nominone. To Hu'mamofitoga noluto lenali hiti kehelito lulata nohune. 3 Lenali Hu'mamofitoga keheli amuya melete minelata nehana yamofihi lamana'a ya'ma li huto nehabe. To komopatini emilata nehite foya'a amuya melete minelata nehabe. To Sipi Bo Yesu Kilisito alina kumu yabe luto keheli ule'ale hite geba hite minelata nehabe. Ya'ma afotifu Hu'mamofihi ai gobisalo kehelito fokehi holata nohune. 4 Lalalutigita, Hu'mau komopa'a lepito ai bona'a lenele'mo lolo hu'ehinamo ya'ma keheli'ohune. 5 Ka lamana'a ito buto lu lepi'ohuta yabe. Lali labagagutiko ka lepi'ohuta meni'ibe. O'e, Hu'mamofihi amuya'a hiti ni'igo ai Sikalafu'uba ya'ma lamana'a ni'ibe luto lu lepi'ehinamo yabe. Lali lenalitoga mino'ohuta hapati abu ge'ahanamo ni'ibe. Lenali kumu yabe luto lenele'mo bati hilune luto lamana huto mino'ohuta bu ge'ahabe. 6 Ya hulotogo moloto minoto hu'ohuta ya suhi mege'i melete minete hi'ahana. Sipi Bouba hu'ehina ya suhi kehelilata hi'ahanamo ni'ibe. Ya hite minete bona'magi ka lamana'a kumu lenele'mo sibina nehanogo lenali kosele'i mehose ka lamana'a keheliya ilune lite komopatinigu sabiyana lolo higo keheli'ahana ni'ibe. Hu'mamofihi Sikalafu'uba lenele'mo bati higo mine'ahana yabe. 7 Ya hite, lenali kohe tete Yesuhi kapogu nebago Masetonia metogati to Akaiya metogati Yesuhi keheli emi'ahana bona'i lenali mege'i melete mine'ahana. 8 Lenalitogati ya'ma Sipi Bomofihi hetofa kagauba sipi huto buto Masetonia metoga to Akaiya metoga bu'ehina. Ya hu'ehina ya'asigo meni'ibe. Lenali Hu'mamofi kumu keheli amuya mele'ahanamofihi kaga'a noto noto hepatoga bulago yamofihi lu lepiluta'a mone mehibe. 9 Ana bona'magi asaga'i lenalitoga buto nohutogo lele'mo lamana hi'ahana kaga'a lelite ete limilata nehabe. To ana hite, lenali ya'ma bona'mofihi meha'a nasana lolo hite mine'ahana lenemegesa hi neemite Hu'mamofihi amuya bo'a lamana'a lolo hite aitoga i ke'mete agoya hu emi'ahana ka lalitoga beto nehana yabe. Ai Hu'mau minoba minoba hulata bologa lenemehi emilata nehana keheli'ohune. 10 Ya nehite pana'a fili'ehinaguti le'mo ho ti'ehina bo, Yesu minomo buto kokulumaguti limilina'mu geba hite nehabe. Ai Yesu, Hu'mau alihi foipana'momu'i osahi epilina'aloti lubuto bilata nohibe. Ya'ma kamofihi noto noto bona'i kehelilata nehite lu limilata nehabe.